April 23, 2024
April 23, 2024
ബിജെപി നേതാക്കളും ലോക്സഭ സ്ഥാനാര്ഥികളുമായ അനില് ആന്റണി, ശോഭ സുരേന്ദ്രന് എന്നിവര്ക്കെതിരേ ഗുരുതര ആരോപണവും തെളിവുകളുമായി ദല്ലാള് നന്ദകുമാര്. അനില് ആന്റണി തന്റെ കയ്യില് നിന്ന് 25 ലക്ഷം രൂപ വാങ്ങിയെന്നും അത് തിരിച്ചു തന്നുവെന്നും ശോഭാ സുരേന്ദ്രന് 10 ലക്ഷം വാങ്ങിയിട്ട് തിരിച്ചു തന്നില്ലെന്നും ദല്ലാള് നന്ദകുമാര് ആരോപിച്ചു.
തന്റെ അഭിഭാഷകനെ ഹൈക്കോടതി സ്റ്റാന്ഡിങ് കൗണ്സിലില് നിയമിക്കാനാണ് അനില് ആന്റണി 25 ലക്ഷം കൈപ്പറ്റിയത്. എന്നാല്, നിയമനം നടന്നില്ല. തുടര്ന്ന് പലതവണയായി 25 ലക്ഷം തിരികെ നല്കി. 2014ലാണ് പണം കൈമാറിയത്. പണം കൈമാറിയ ഡല്ഹിയിലെ സാഗര് രത്ന ഹോട്ടലിന്റെ പുറത്ത് ദുബായ് ഡ്യൂട്ടി പെയ്ഡിന്റെ കവറുമായി നന്ദകുമാര് നില്ക്കുന്നതിന്റെയും കവര് വാങ്ങുന്നതിന്റെയും ചിത്രങ്ങളും മാധ്യമങ്ങള്ക്ക് മുന്നില് ദല്ലാള് നന്ദകുമാര് പ്രദര്ശിപ്പിച്ചു.
അനിലിന്റെ പുതിയ ഗൂഢസംഘം എന്ന് പറഞ്ഞ് നരേന്ദ്രമോദിക്കൊപ്പം അനില് ആന്റണി, ആന്ഡ്രൂസ് ആന്റണി എന്നിവര് നില്ക്കുന്ന ചിത്രവും നന്ദകുമാര് പുറത്ത് വിട്ടു. അനില് ആന്റണിയെ ഇത്തരം വേലകള് പഠിപ്പിച്ചത് ആന്ഡ്രൂസ് ആന്റണിയാണെന്നും കാലാകാലങ്ങളായി പ്രധാനമന്ത്രിയുടെ ഓഫീസുമായി ഇയാള് ബന്ധപ്പെടുന്നുണ്ടെന്നും നന്ദകുമാര് ആരോപിച്ചു. ഇപ്പോള് ഇവര് എന്ഡിഎയ്ക്കൊപ്പമാണെങ്കില് ഇന്ത്യ മുന്നണി അധികാരത്തിലെത്തിയാല് ഈ സംഘം അവര്ക്കൊപ്പം പോകുമെന്നും നന്ദകുമാര് പറഞ്ഞു.
സാമ്പത്തിക പ്രതിസന്ധിയാണെന്നും പണം കടമായി വേണമെന്നും ആവശ്യപ്പെട്ടാണ് ശോഭ സുരേന്ദ്രന് തന്നെ സമീപിച്ചതെന്നും നന്ദകുമാര് ആരോപിച്ചു. പണം കടമായി ആവശ്യപ്പെട്ട ശോഭ സുരേന്ദ്രനോട് പണം കടമായി കൊടുക്കാന് താന് ബാങ്കല്ലെന്ന് അറിയിച്ചപ്പോള് തൃശൂരിലെ ശോഭയുടെ പേരിലുള്ള വസ്തു തനിക്ക് നല്കാമെന്നു പറഞ്ഞു അതിന്റെ രേഖകളെല്ലാം കൈമാറി. അതിന് പിന്നാലെ 2023 ജനുവരി നാലിന് ഡല്ഹി പാര്ലമെന്റ് സ്ട്രീറ്റിലെ എസ്ബിഐ ബ്രാഞ്ചില് നിന്ന് ശോഭയുടെ അക്കൗണ്ടിലേക്ക് പത്തു ലക്ഷം നല്കിയതെന്നും നന്ദകുമാര് വ്യക്തമാക്കി. ഇതിന്റെ രസീതും നന്ദകുമാര് പുറത്തുവിട്ടു. എന്നാല്, ഈ വസ്തു കാണാന് പോയപ്പോഴാണ് ഇതേവസ്തു നല്കാമെന്ന് പറഞ്ഞ് മറ്റു രണ്ടുപേരില് നിന്ന് ശോഭ പണം കൈപ്പറ്റിയത് അറിയാന് സാധിച്ചത്. അതിനാല് വസ്തു ഇടപാട് നടന്നില്ല. പിന്നീട് പല തവണ പണം തിരികെ ആവശ്യപ്പെട്ടെങ്കിലും തിരിച്ചു നല്കിയില്ലെന്നും നന്ദകുമാര് ആരോപിച്ചു.
26ന് തിരഞ്ഞെടുപ്പ് കഴിഞ്ഞാല് ബാക്കി തെളിവുകള് പുറത്തുവിടും. തനിക്കെതിരെ കേസ് വന്നാല് പണമിടപാടിന് ഇടനില നിന്ന മുതിര്ന്ന കോണ്ഗ്രസ് നേതാവ് പി ജെ കുര്യന് സാക്ഷിയാവുമെന്നും ദല്ലാള് നന്ദകുമാര് പറഞ്ഞു. അനില് തെറ്റുകാരനാണ് എന്ന് ഒരു കോണ്ഗ്രസ് നേതാവ് പോലും ഇതുവരെ പറഞ്ഞിട്ടില്ലെന്നും എ കെ ആന്റണിയുടെ മകന് ആയതുകൊണ്ടാണ് ആരും ഒന്നും പറയാത്തതെന്നും നന്ദകുമാര് പറഞ്ഞു.
അതേസമയം അനില് ആന്റണി ആരോപണം നിഷേധിച്ചു. ദല്ലാള് നന്ദകുമാറിനെതിരെ പരാതി നല്കുമെന്നും പ്രതികരിച്ചു.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/Iq3CVicSDrS1LvIBvvkToc
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F