April 30, 2024
April 30, 2024
ദോഹ: ഖത്തറിലെ അൽ വാബിൽ പെൺകുട്ടികൾക്കായി ഔഖാഫ് മന്ത്രാലയം ഇസ്ലാമിക് വിദ്യാഭ്യാസ കേന്ദ്രം നിർമിക്കും. 750 വിദ്യാർത്ഥിനികളെ ഉൾക്കൊള്ളുന്ന ഇസ്ലാമിക് വിദ്യാഭ്യാസ കേന്ദ്രം നിർമ്മിക്കുന്നതിനുള്ള പദ്ധതി ആരംഭിക്കുന്നതായി ഔഖാഫ്, ഇസ്ലാമിക കാര്യ മന്ത്രാലയത്തിലെ ജനറൽ ഡയറക്ടറേറ്റ് ഓഫ് എൻഡോവ്മെൻ്റ് വിഭാഗം പ്രഖ്യാപിച്ചു. കഴിഞ്ഞ ദിവസം നടന്ന ചടങ്ങിൽ ഔഖാഫ്, ഇസ്ലാമിക കാര്യ മന്ത്രി ഗാനേം ബിൻ ഷഹീൻ അൽ ഗാനേം പദ്ധതിയുടെ ശിലാസ്ഥാപനം നിർവഹിച്ചു.
‘മോസ ബിൻത് മുഹമ്മദ് ഖുറാൻ ആൻഡ് ദഅവാ സെൻ്റർ’ എന്ന പേരിലാണ് സെന്റർ ആരംഭിക്കുന്നത്. 24,800 ചതുരശ്ര മീറ്റർ വിസ്തീർണ്ണമുള്ള പുതിയ കേന്ദ്രത്തിൽ 50 ക്ലാസ് മുറികളും 200 വനിതാ ജീവനക്കാർക്കുള്ള 42 അഡ്മിനിസ്ട്രേറ്റീവ് ഓഫീസുകളും ഉണ്ടായിരിക്കും. കൂടാതെ, തിയേറ്റർ, മൾട്ടി പർപ്പസ് ഹാളുകൾ, സ്പോർട്സ് ക്ലബ്, 306 പാർക്കിംഗ് ലോട്ടുകൾ എന്നിവയും സജ്ജീകരിച്ചിട്ടുണ്ട്.
ഖുർആനിൻ്റെയും ദഅവയുടെയും പ്രധാന ആസ്ഥാനം, കോൺഫറൻസ് സെൻ്റർ, ഹോളി ഖുർആൻ ടീച്ചിംഗ് സെൻ്റർ, ആക്റ്റിവിറ്റികളുടേയും പ്രോഗ്രാമുകളുടേയും സെൻ്റർ, സ്പോർട്സ് ആൻഡ് ഹെൽത്ത് ക്ലബ് ഏരിയ എന്നിങ്ങനെ വിവിധ പ്രവർത്തനങ്ങളും പരിപാടികളും പ്രതിഫലിപ്പിക്കുന്ന അഞ്ച് വിഭാഗങ്ങളാണ് കേന്ദ്രത്തിലുള്ളത്.
ഖത്തറിൻ്റെ ഇസ്ലാമിക, അറബ് പൈതൃകം കണക്കിലെടുത്ത്, സ്ത്രീകളുടെ പദവിയും അവരുടെ സാമൂഹിക പങ്കും പിന്തുണയ്ക്കുന്നതിൽ സംഭാവന നൽകിയ ഖത്തറിനെയും അതിൻ്റെ നേതൃത്വത്തെയും ആഘോഷിക്കാനാണ് കേന്ദ്രം ആരംഭിക്കുന്നതെന്ന് ജനറൽ ഡയറക്ടറേറ്റ് ഓഫ് എൻഡോവ്മെൻ്റ് ഡയറക്ടർ ഡോ. ഷെയ്ഖ് ഖാലിദ് ബിൻ മുഹമ്മദ് ബിൻ ഗാനേം അൽതാനി പറഞ്ഞു.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/Iq3CVicSDrS1LvIBvvkToc
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F