September 02, 2022
September 02, 2022
തിരുവനന്തപുരം: സിപിഎം സംസ്ഥാന സെക്രട്ടറിയായി ചുമതലയേറ്റെടുത്തതിനെ തുടര്ന്ന് എംവി ഗോവിന്ദന് രാജിവെച്ച ഒഴിവിലേക്ക് സ്പീക്കർ എം.ബി രാജേഷിനെ നിയമിക്കും. എംവി ഗോവിന്ദന് കൈകാര്യം ചെയ്തിരുന്ന എക്സൈസ്, തദ്ദേശ വകുപ്പുകളുടെ ചുമതലയാണ് രാജേഷിന് നൽകുക.. എംവി ഗോവിന്ദന് പകരം സ്പീക്കറായിരുന്ന എംബി രാജേഷിനെ മന്ത്രിസഭയില് ഉള്പ്പെടുത്തിയതായി സിപിഎം സെക്രട്ടറിയേറ്റ് വാര്ത്താകുറിപ്പില് അറിയിക്കുകയായിരുന്നു. സ്പീക്കറായി എഎന് ഷംസീറിനെയും തെരഞ്ഞെടുത്തു.സെപ്റ്റംബര് ആറിന് ഉച്ചക്ക് 12നായിരിക്കും സത്യപ്രതിജ്ഞ.
രണ്ടുതവണ എംപിയായ രാജേഷ് ആദ്യമായാണ് നിയമസഭയിലെത്തുന്നത്. വി ടി ബല്റാം തുടര്ച്ചയായി രണ്ടുതവണ ജയിച്ച തൃത്താല മണ്ഡലത്തില് അദ്ദേഹത്തെ തോല്പ്പിച്ചാണ് എംബി രാജേഷ് ഇത്തവണ മന്ത്രിസഭയിലെത്തുന്നത്.
എസ്എഫ്ഐ സംസ്ഥാന സെക്രട്ടറിയായും ഡിവൈഎഫ്ഐ സംസ്ഥാന പ്രസിഡന്റ്, അഖിലേന്ത്യാ പ്രസിഡന്റ് എന്നീ നിലകളിലും എംബി രാജേഷ് പ്രവര്ത്തിച്ചു. 2009ലും 2014ലും പാലക്കാട് ലോക്സഭാ മണ്ഡലത്തിലെ എംപി. നിലവില് സിപിഎം സംസ്ഥാന സമിതി അംഗം.
തലശ്ശേരിയില്നിന്ന് രണ്ടാം തവണയാണ് എഎന് ഷംസീര് എംഎൽഎയായി തിരഞ്ഞെടുക്കപ്പെട്ടത്. നിലവില് സിപിഎം സംസ്ഥാന സമിതി അംഗമാണ്. എസ്എഫ്ഐ സംസ്ഥാന സെക്രട്ടറി, ഡിവൈഎഫ്ഐ സംസ്ഥാന പ്രസിഡന്റ് എന്നീ സ്ഥാനങ്ങളില് പ്രവർത്തിച്ചു.
സജി ചെറിയാന് രാജിവെച്ചൊഴിഞ്ഞതിന് പകരം ഇപ്പോള് മന്ത്രിയെ നിയമിക്കേണ്ടതില്ലെന്നും തീരുമാനിച്ചു.
ന്യൂസ്റൂം വാർത്തകൾ മുടങ്ങാതെ ലഭിക്കാൻ https://chat.whatsapp.com/DoTp5mITouhJcwHKcDKLsm എന്ന ലിങ്കിൽ ജോയിൻ ചെയ്യുക