July 31, 2021
July 31, 2021
കൊച്ചി: കോതമംഗലം നെല്ലിക്കുഴിയില് യുവതീ യുവാക്കള് തമ്മിലുളള സൗഹൃദം തകര്ന്നതാണ് നാടിനെ നടുക്കിയ സംഭവത്തിന്കാരണമെന്ന് പൊലീസിന്റെ പ്രാഥമിക നിഗമനം. പ്രതി കൊലപാതകത്തിന് ഉപയോഗിച്ചത് 7.62 എം എം റൈഫിള് കണ്ടെത്തിയിട്ടുണ്ട്.
കോതമംഗലം നെല്ലിക്കുഴിയില് കൊല്ലപ്പെട്ട ഡെന്റല് കോളജ് വിദ്യാര്ത്ഥിനി കണ്ണൂര് നാറാത്തെ മാനസയുടെയും കൊലപാതത്തിന് ശേഷം സ്വയം നിറയൊഴിച്ച് ആത്മഹത്യ ചെയ്ത കണ്ണൂര് മേലൂര് സ്വദേശി രഖിലിന്റെ പോസ്റ്റ്മോര്ട്ടം ഇന്ന് നടക്കും.
കോതമംഗലം ബസേലിയോസ് ആശുപത്രിയില് സൂക്ഷിച്ചിട്ടുള്ള മൃതദേഹം രാവിലെ ഇന്ക്വസ്റ്റ് നടപടികള് പൂര്ത്തിയാക്കി കളമശേരി മെഡിക്കല് കോളേജ് ആശുപത്രിയില് എത്തിച്ചാണ് പോസ്റ്റ്മോര്ട്ടം നടത്തുക. മാനസയുടേയും രഖിലിന്റേയും ബന്ധുക്കള് എറണാകുളത്ത് എത്തിയിട്ടുണ്ട്.
ഒരേ സമയം ഏഴ് നിറയൊഴിക്കാന് കഴിയുന്ന തോക്ക് എങ്ങനെ രഖിലിന്റെ കൈവശം എത്തി എന്നത് പൊലീസ് അന്വേഷിക്കുന്നുണ്ട്. സംഭവത്തിന്റെ ദൃക്സാക്ഷികളായ വിദ്യാര്ത്ഥിനികള്, കോളജിലെ സഹപാഠികള് അടക്കമുള്ളവരില് നിന്ന് പൊലീസ് കൂടുതല് വിവരങ്ങള് ഇന്ന് ശേഖരിക്കും. ആലുവ റൂറല് എസ്പിയുടെ നേതൃത്വത്തിലാണ് അന്വേഷണം നടക്കുന്നത്.