August 23, 2019
August 23, 2019
തിരുവനന്തപുരം: ബിഡിജെഎസ് നേതാവ് തുഷാര് വെള്ളാപ്പള്ളിയുടെ അറസ്റ്റില് അസ്വാഭാവികത ഉണ്ടെന്നും മറ്റ് പ്രതികളെ പോലെ അല്ല തുഷാറെന്നും വ്യവസായ മന്ത്രി ഇ പി ജയരാജന് പറഞ്ഞു. പ്രത്യക്ഷത്തില് കാണുമ്പോള് തുഷാറിന്റെ അറസ്റ്റില് അസ്വാഭാവികത ഉണ്ട്. ഏറ്റവും മഹനീയമായ കാര്യമാണ് കേരളത്തിന്റെ മുഖ്യമന്ത്രി നടത്തിയിരിക്കുന്നത്. കക്ഷി രാഷ്ട്രീയത്തിനപ്പുറം കേരളത്തിലെ മുഴുവന് ജനങ്ങളുടെ അവകാശങ്ങള് സംരക്ഷിക്കാന് മുഖ്യമന്ത്രി പേരാടുകയാണെന്നും മന്ത്രി ഇ പി ജയരാജന് പറഞ്ഞു.
ബിസിനസ് പങ്കാളിക്ക് വണ്ടിചെക്ക് നല്കിയ കേസില് കഴിഞ്ഞ ദിവസം രാത്രി അജ്മാനിലെ ഒരു പഞ്ചനക്ഷത്ര ഹോട്ടലില് വച്ചാണ് ബിഡിജെഎസ് നേതാവ് തുഷാര് വെള്ളാപ്പള്ളിയെ അറസ്റ്റ് ചെയ്തത്. തൃശ്ശൂര് സ്വദേശി നാസില് അബ്ദുള്ളയുടെ പരാതിയിലാണ് അറസ്റ്റ്. പത്തുമില്യണ് യുഎഇ ദിര്ഹത്തിന്റെ വണ്ടിചെക്ക് കേസിലാണ് നടപടി. ഏകദേശം 20 കോടി രൂപയുടെ വണ്ടിചെക്കാണ് തുഷാര് നല്കിയത്. ഒത്തുതീര്പ്പിനെന്ന പേരില് വിളിച്ച് വരുത്തിയായിരുന്നു അറസ്റ്റ്. തുഷാറിനെ അജ്മാന് ജയിലിലേക്ക് മാറ്റി. പിന്നീട് പ്രവാസി വ്യവസായി എംഎ യൂസഫലി ജാമ്യത്തുക കെട്ടിവച്ചതോടെയാണ് തുഷാറിന് ജാമ്യം ലഭിച്ചത്. അതേസമയം, നാസില് അബ്ദുള്ളയുടെ കൊടുങ്ങല്ലൂരിലെ വീട്ടില് പൊലീസ് പരിശോധന നടത്തിയിരുന്നു. തുഷാറിനെ കുടുക്കിയതാണെന്ന് വെള്ളാപ്പള്ളി നടേശന് പറഞ്ഞു. കള്ളം പറഞ്ഞാണ് തുഷാറിനെ യുഎഇയിലേക്ക് വിളിച്ചുവരുത്തിയതെന്നും വെള്ളാപ്പള്ളി പറഞ്ഞു.
പത്തു വര്ഷം മുമ്പാണ് കേസിനാസ്പദമായ സംഭവം. പിന്നീട് നാട്ടിലേയ്ക്ക് കടന്ന തുഷാര് പലതവണ പണം നല്കാമെന്ന് പറഞ്ഞെങ്കിലും സ്വാധീനം ഉപയോഗിച്ച് ഒഴിഞ്ഞു മാറുകയായിരുന്നുവെന്നും പരാതിയില് പറയുന്നു.