May 13, 2024
May 13, 2024
ദോഹ: ഗസ യുദ്ധത്തിൽ ദുരിതമനുഭവിക്കുന്ന ഫലസ്തീൻ വനിതകൾക്ക് ആദരവായി ഖത്തറിൽ പ്രത്യേക സമ്മേളനം സംഘടിപ്പിച്ചു. ‘സുരക്ഷ എന്റെ അവകാശമാണ്’ എന്ന പ്രമേയത്തിൽ ‘വിമൻ ഫോർ ഫലസ്തീൻ’ എന്ന പേരിൽ നടന്ന സമ്മേളനത്തിൽ ഖത്തർ വിദേശകാര്യ മന്ത്രാലയത്തിലെ അന്താരാഷ്ട്ര സഹകരണ സഹമന്ത്രി ലുൽവ ബിൻത് റാഷിദ് അൽ ഖാതറും സമ്മേളനത്തിൽ പങ്കെടുത്തു. കര, വ്യോമ മാർഗങ്ങളിലൂടെ ഇസ്രായേൽ സൈന്യം നടത്തുന്ന ആക്രമണങ്ങളുടെ പ്രധാന ഇരകളായ ഫലസ്തീൻ വനിതകളോടും കുട്ടികളോടുമുള്ള ഐക്യദാർഢ്യമായാണ് സമ്മേളനം സംഘടിപ്പിച്ചത്.
ഫലസ്തീനികളുടെ ക്ഷമയും പരിശ്രമങ്ങളും ലോകത്തിന്റെ ചിന്തകളെ മാറ്റിമറിച്ചതായി ലുൽവ അൽ ഖാതർ പറഞ്ഞു. യുദ്ധമുഖത്ത് ധീരമായി പ്രവർത്തിച്ച നിരവധി ഫലസ്തീൻ വനിതകളുടെയും പ്രഫഷനലുകളുടെയും പ്രവർത്തനങ്ങളെ ഉദാഹരിച്ചായിരുന്നു ലുൽവ സംസാരിച്ചത്.
"സുരക്ഷിതത്വം ഓരോ മനുഷ്യന്റെയും അവകാശമാണ്. മനുഷ്യത്വം നഷ്ടപ്പെട്ട, വികലമായ മനസ്സുള്ളവർ മാത്രമാണ് ഇത്തരം അവകാശങ്ങൾ ലംഘിക്കുന്നത്. ഫലസ്തീനി വനിതകളുടെ പോരാട്ട വീര്യത്തെയും ചെറുത്തു നിൽപിനെയും ലോകം ആദരിക്കുന്നു," ലുൽവ അൽ ഖാതർ പറഞ്ഞു.
"നിങ്ങളുടെ ക്ഷമയും സ്ഥിരോത്സാഹവും ലോകത്തിന്റെ ചിന്തകളെ തന്നെ മാറ്റിമറിച്ചു. കിഴക്ക്, പടിഞ്ഞാറ് അതിരുകൾ മായ്ച്ച് ലോകം നിങ്ങൾക്കൊപ്പം അണിനിരക്കാൻ തുടങ്ങി. സ്വാതന്ത്ര്യത്തെയും സമത്വത്തെയുമെല്ലാമുള്ള പടിഞ്ഞാറൻ ചിന്തകളെയും നിങ്ങൾ മാറ്റിമറിച്ചു. നിങ്ങൾ ഫലസ്തീൻ സ്ത്രീകൾ, പുരുഷന്മാർ, കുട്ടികൾ എന്നിവരോട് ഞങ്ങളും കടപ്പെട്ടിരിക്കുന്നു," ലുൽവ കൂട്ടിച്ചേർത്തു.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/Iq3CVicSDrS1LvIBvvkToc
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F