ഖത്തർ-യു.എ.ഇ യോഗ്യതാ മത്സരം; ആരാധകർക്ക് മാർഗനിർദേശങ്ങളുമായി ക്യു.എഫ്.എ
September 04, 2024
September 04, 2024
ന്യൂസ്റൂം സ്പോർട്സ് ഡെസ്ക്
ദോഹ: 2026 ഫിഫ ലോകകപ്പിനുള്ള മൂന്നാം യോഗ്യത മത്സരം നാളെ നടക്കാനിരിക്കെ, ആരാധകർക്ക് മാർഗനിർദേശങ്ങൾ പ്രഖ്യാപിച്ചു. ഖത്തർ ഫുട്ബോൾ അസോസിയേഷനാണ് (ക്യു.എഫ്.എ) മാർഗനിർദേശങ്ങൾ പ്രഖ്യാപിച്ചത്. നാളെ (സെപ്തംബര് 5) ദോഹയിലെ അഹ്മദ് ബിന് അലി സ്റ്റേഡിയത്തില് വൈകുന്നേരം 7 മണിക്കാണ് മത്സരം. യു.എ.ഇയാണ് ഖത്തറിന്റെ എതിരാളികൾ.
ഗ്രൂപ്പ് എയിലാണ് ഖത്തറുള്ളത്. ഗ്രൂപ്പിലെ ആദ്യ രണ്ട് ടീമുകൾ 2026 ജൂൺ 11 മുതൽ ജൂലൈ 19 വരെ കാനഡ, മെക്സിക്കോ, യുണൈറ്റഡ് സ്റ്റേറ്റ്സ് എന്നിവിടങ്ങളിൽ നടക്കുന്ന ലോകകപ്പ് 2026-ന് നേരിട്ട് യോഗ്യത നേടും. മത്സരത്തിന്റെ 75 ശതമാനം ടിക്കറ്റുകളും വിറ്റഴിഞ്ഞതായി ഖത്തർ ഫുട്ബോൾ അസോസിയേഷൻ (ക്യു.എഫ്.എ) അറിയിച്ചു.
നിർദ്ദേശങ്ങൾ:
1. നേരത്തെയുള്ള വരവ്: സ്റ്റേഡിയം ഗേറ്റുകൾ വൈകിട്ട് 4 മണിക്ക് തുറക്കും. തിരക്ക് ഒഴിവാക്കാൻ ആരാധകർക്ക് നേരത്തെ തന്നെ സ്റ്റേഡിയത്തിൽ എത്തിച്ചേരാം.
2. പാർക്കിംഗ് ക്രമീകരണങ്ങൾ: പടിഞ്ഞാറൻ പാർക്കിംഗ് സ്ഥലം മുഴുവൻ ആരാധകരുടെ വാഹനങ്ങൾ പാർക്ക് ചെയ്യുന്നതിനായി നിയുക്തമാക്കിയിട്ടുണ്ട്. കൃത്യമായ ലൊക്കേഷനുകൾക്കായി ഫാൻ പാർക്കിംഗ് മാപ്പുകൾ റഫർ ചെയ്യാം.
3. ടിക്കറ്റ്: സാധുതയുള്ള ടിക്കറ്റില്ലാതെ ആരെയും സ്റ്റേഡിയത്തിന് അകത്തേക്ക് അനുവദിക്കില്ല. മത്സര ദിവസം സ്റ്റേഡിയത്തിൽ ടിക്കറ്റുകളൊന്നും വിൽക്കില്ല എന്നതും ശ്രദ്ധിക്കേണ്ടതാണ്.
4. മെട്രോ ഗതാഗതം: ആരാധകർക്ക് ഏറ്റവും കാര്യക്ഷമമായ ഗതാഗത മാർഗ്ഗമായി മെട്രോ സർവീസുകൾ ഉപയോഗിക്കാം. സ്റ്റേഡിയത്തിലേക്കെത്താൻ ആരാധകർ ഗ്രീൻ ലൈനാണ് ഉപയോഗിക്കേണ്ടത് (മാൾ ഓഫ് ഖത്തർ സ്റ്റേഷൻ).
5. സ്റ്റേഡിയം നാവിഗേഷൻ: സ്റ്റേഡിയത്തിന് ചുറ്റും വ്യക്തമായ സൂചനകൾ സ്ഥാപിക്കും. ആരാധകർക്ക് അവരുടെ നിയുക്ത പാർക്കിംഗ് ഏരിയകളും, ഇരിപ്പിട വിഭാഗങ്ങളും കണ്ടെത്താൻ ഇത് സഹായിക്കും.
6. ഫാൻ ആക്സസറികൾ: ആരാധകർക്ക് പതാകകളും സ്കാർഫുകളും വിതരണം ചെയ്യും.
7. റിഫ്രഷ്മെൻ്റുകൾ: സ്റ്റേഡിയത്തിനുള്ളിലെ ഒന്നിലധികം റെസ്റ്റോറൻ്റുകളിൽ ഭക്ഷണവും പാനീയങ്ങളും നൽകും.
8. പ്രാർത്ഥനാ സൗകര്യങ്ങൾ: മഗ്രിബ്, ഇഷാ പ്രാർത്ഥനകൾക്കായി സ്റ്റേഡിയത്തിലുടനീളം നിരവധി പ്രാർത്ഥനാ സ്ഥലങ്ങൾ ലഭ്യമാകും.
