ഖത്തർ ടൂറിസം അവാർഡ് ഒക്ടോബർ 27ന് പ്രഖ്യാപിക്കും
July 21, 2024
July 21, 2024
ന്യൂസ്റൂം ബ്യുറോ
ദോഹ: ഖത്തർ ടൂറിസം അവാർഡിന്റെ രണ്ടാം പതിപ്പ് വിജയികളെ ഒക്ടോബർ 27ന് പ്രഖ്യാപിക്കും. കൂടാതെ, ഏഴംഗ വിധികർത്താക്കളെയും പ്രഖ്യാപിച്ചു. ശൈഖ അലനൂദ് ബിൻത് ഹമദ് അൽതാനി, അലി ബിൻ ത്വവർ അൽ കുവാരി, എൻജിനീയർ അഅ്സം അബ്ദുൽ അസീസ് അൽ മന്നാഇ, മാർസൽ ലെയ്സർ, പ്രഫ. റന സുബ്ഹ്, റംസാൻ റാഷിദ് അൽ നഈമി, ഡോ. അബ്ദുല്ല ഹസ്സ അൽ മെഹ്ഷാദി എന്നിവരാണ് ജഡ്ജിങ് പാനലിലുള്ളത്.
രാജ്യത്തെ മികച്ച വിനോദസഞ്ചാര സംരംഭങ്ങൾ, സേവനങ്ങൾ, നൂതന ആശയങ്ങൾ, മികച്ച നേട്ടങ്ങൾ എന്നിവയ്ക്ക് പ്രോത്സാഹനം നൽകാനാണ് ഖത്തർ ടൂറിസം പുരസ്കാരം നൽകുന്നത്. തെരഞ്ഞെടുക്കപ്പെടുന്ന സംരംഭങ്ങൾക്ക് ഖത്തർ ടൂറിസം ആഗോള പ്രചാരം നൽകും. ഖത്തറിലെ ടൂറിസം മേഖലയുടെ വളർച്ചക്കും കാര്യക്ഷമതക്കും ഏറ്റവും മികച്ച സേവനങ്ങൾ നൽകുന്ന സ്ഥാപനങ്ങളെയും വ്യക്തികളെയും കണ്ടെത്തി അംഗീകാരം നൽകുകയാണ് ഖത്തർ ടൂറിസം അവാർഡിലൂടെ ലക്ഷ്യമിടുന്നത്. ഖത്തർ ടൂറിസം പുരസ്കാരങ്ങൾ സമഗ്രത, പ്രകടനം, പുതുമ എന്നിവക്കാണ് ഊന്നൽ നൽകുന്നത്.
സേവന മികവ്, ഗാസ്ട്രോണമിക് അനുഭവം, ഐക്കണിക് ആകർഷണം, ലോകോത്തര പരിപാടി, ഡിജിറ്റൽ കാൽപ്പാട്, സ്മാർട്ട് - സുസ്ഥിര വിനോദസഞ്ചാരം, സാമൂഹിക നേതൃത്വം എന്നിങ്ങനെ ഏഴ് പ്രധാന വിഭാഗങ്ങളായി തിരിച്ചാണ് അവാർഡുകൾ നൽകുന്നത്. വ്യക്തികൾക്കും, സ്ഥാപനങ്ങൾക്കും ഓൺലൈൻ വഴി അപേക്ഷ സമർപ്പിക്കാം. ആഗസ്റ്റ് 8 ആണ് അവസാന തീയതി. കഴിഞ്ഞ വർഷം മുതലാണ് വേൾഡ് ടൂറിസം ഓർഗനൈസേഷനുമായി സഹകരിച്ച് ഖത്തർ ടൂറിസം അവാർഡുകൾ നൽകുന്നത്.
