ഭക്ഷ്യവിപണനത്തിൽ സുരക്ഷ പ്രധാനം,ഖത്തറിൽ പരിശോധന ശക്തമാക്കി
August 04, 2024
August 04, 2024
ന്യൂസ്റൂം ബ്യുറോ
ദോഹ: ഖത്തറില് ഇറക്കുമതി ചെയ്യുന്നതും ആഭ്യന്തരമായി വ്യാപാരം നടത്തുന്നതുമായ ഭക്ഷ്യവസ്തുക്കളുടെ സുരക്ഷ ഉറപ്പാക്കുന്നതിനുള്ള ശ്രമങ്ങള് ശക്തിപ്പെടുത്തുന്നതിനായി പൊതുജനാരോഗ്യ മന്ത്രാലയത്തിന്റെ നേതൃത്വത്തിൽ പരിശോധനകൾ ഊർജിതമാക്കി.
2024 ന്റെ ആദ്യ പകുതിയില്, ഇറക്കുമതി ചെയ്ത ഭക്ഷണത്തിന്റെ 60,520 ഷിപ്പ്മെന്റുകളാണ് മന്ത്രാലയം പരിശോധിച്ചത്. ഭക്ഷ്യസുരക്ഷയും പാലിക്കേണ്ട സാങ്കേതിക മാനദണ്ഡങ്ങൾ പാലിക്കുന്നുണ്ടോയെന്നും ഉറപ്പുവരുത്താനാണ് പരിശോധന നടത്തിയത്. മാനദണ്ഡങ്ങള് പാലിച്ച് ഇറക്കുമതി ചെയ്ത ഭക്ഷ്യ വസ്തുക്കള് ആകെ 1,168,695,000 കിലോഗ്രാം ആയിരുന്നു. അതേസമയം, വ്യവസ്ഥകള് പാലിക്കാത്ത 985,676 കിലോഗ്രാം ഭക്ഷ്യ വസ്തുക്കള് നശിപ്പിക്കുകയും 211 കണ്സെയിന്മെന്റുകള് തിരിച്ചയക്കുകയും ചെയ്തു.
2024 ന്റെ ആദ്യ പകുതിയില് 155 കയറ്റുമതി, പുനര് കയറ്റുമതി സര്ട്ടിഫിക്കറ്റുകള്, 104 ഭക്ഷ്യ നശീകരണ സര്ട്ടിഫിക്കറ്റുകള്, 48 ഫുഡ് റീ-ഇന്സ്പെക്ഷന് സര്ട്ടിഫിക്കറ്റുകള് എന്നിവ ഡിപ്പാര്ട്ട്മെന്റ് വിതരണം ചെയ്തു. ഇക്കാലയളവില് ഭക്ഷ്യവസ്തുക്കള് നശിപ്പിക്കാന് 625 അപേക്ഷകളും ഭക്ഷ്യ ഉല്പന്നങ്ങള് പുനഃപരിശോധിക്കാന് 102 അപേക്ഷകളും ലഭിച്ചു. ഉല്പ്പന്നങ്ങളുടെ അന്തിമ ക്ലിയറന്സിനായി 3,119 അഭ്യര്ത്ഥനകളിൽ മന്ത്രാലയം നടപടികൾ എടുക്കുകയും പ്രാദേശിക ഭക്ഷ്യ സ്ഥാപനങ്ങള്ക്കായുള്ള പ്രവര്ത്തന വിവരങ്ങളുടെ രജിസ്ട്രേഷനില് 147 അവലോകനങ്ങളും തുടര്നടപടികളും സ്വീകരിക്കുകയും ചെയ്തു.
കൂടാതെ, സുരക്ഷയ്ക്കും ഗുണനിലവാരത്തിനുമായി പ്രാദേശിക ഭക്ഷ്യ സ്ഥാപനങ്ങളിൽ നിന്നുള്ള 10,064 സാമ്പിളുകൾ പരിശോധിച്ചു.
