NewsRoomme, Latest Malayalam Qatar News Online From Newsroomme.com. Get Latest Malayalam Audio News on your mobile

Breaking News

ഗ്രാൻഡ് മാസ്റ്റർ ജി എസ് പ്രദീപിന് സംസ്‌കൃതി ഖത്തർ സ്വീകരണം നൽകി | ഖത്തറിൽ ശനിയാഴ്ച ദൈർഘ്യംകൂടിയ പകൽ,ചൂട് കനക്കും | ഇറാൻ അവസരം കാത്തിരിക്കുകയാണ്,ഇസ്രായേലിന്റെ അയേൺ ഡോം മിസൈലുകൾ ഒരാഴ്ചയ്ക്കകം തീരുമെന്ന് യു.എസ് മാധ്യമങ്ങൾ | ഈ ഒൻപത് രാജ്യങ്ങളുടെ കയ്യിലും ആണവായുധങ്ങളുണ്ട്,ഇറാനെ മാത്രം ലക്ഷ്യമാക്കുന്നതിന് പിന്നിലെ അജണ്ട ഇതാണ് | ഖത്തറിൽ നിന്നുള്ള എയർ ഇന്ത്യ വിമാനങ്ങൾ അനിശ്ചിതമായി വൈകുന്നു | അറ്റകൈക്ക് ഹോർമുസ് കടലിടുക്ക് ഇറാൻ യുദ്ധതന്ത്രമാക്കിയാൽ എല്ലാവർക്കും പണി കിട്ടും,ആശങ്കയോടെ ആഗോളവിപണി | ടാറ്റ പിടിച്ച പുലിവാല്,ആവശ്യത്തിന് വിമാനങ്ങളില്ലാത്തതും സാങ്കേതിക തകരാറും എയർ ഇന്ത്യക്ക് വഴിമുടക്കുന്നു | ആണവ ഭീഷണി,ഖത്തർ വിദേശകാര്യ സഹമന്ത്രി അന്താരാഷ്ട്ര ആണവോർജ ഏജൻസി ഡയറക്ടർ ജനറലുമായി ചർച്ച നടത്തി | ട്രംപിന്റെ ഭീഷണിക്ക് മുന്നിൽ മുട്ടുമടക്കില്ലെന്ന് ഇറാൻ,സമുദ്ര സുരക്ഷ ഉറപ്പാക്കണമെന്ന് ജിസിസി | ഇറാനിലെ ആണവ കേന്ദ്രങ്ങളെ ലക്ഷ്യം വയ്ക്കുന്നത് വലിയ പ്രത്യാഘാതങ്ങളുണ്ടാക്കുമെന്ന് ഖത്തറിന്റെ മുന്നറിയിപ്പ് |

ഖത്തറിലെ ആരോഗ്യ മേഖലയിൽ ജോലി ചെയ്യുന്നതിന് ലൈസൻസ് ലഭിക്കാൻ തെറ്റായ രേഖകൾ സമർപ്പിച്ച 83 അപേക്ഷകരെ പൊതുജനാരോഗ്യ മന്ത്രാലയം പിടികൂടി

July 31, 2024

ന്യൂസ്‌റൂം ബ്യുറോ

ദോഹ: ഖത്തറിൽ ആരോഗ്യ മേഖലയിൽ പ്രാക്ടീസ് ചെയ്യുന്നതിനുള്ള ലൈസൻസ് നേടുന്നതിന് 2022, 2023 വർഷങ്ങളിൽ തെറ്റായതോ തെറ്റിദ്ധരിപ്പിക്കുന്നതോ ആയ രേഖകൾ സമർപ്പിച്ച 83 വ്യക്തികളെ കണ്ടെത്തിയതായി പൊതുജനാരോഗ്യ മന്ത്രാലയം (MoPH) അറിയിച്ചു. രാജ്യത്ത് ഹെൽത്ത് കെയർ മേഖലയിൽ ജോലി ചെയ്യാൻ ആഗ്രഹിക്കുന്ന ആരോഗ്യ വിദഗ്ധരുടെ യോഗ്യത പരിശോധിക്കുന്നതിനുള്ള കർശനമായ നടപടികൾ നടത്തിവരുന്നുണ്ട്. ഇവർക്ക് ലൈസൻസ് അനുവദിക്കുന്നതിന് മുമ്പാണ് നിയമലംഘനങ്ങൾ കണ്ടെത്തിയതെന്നും അധികൃതർ വ്യക്തമാക്കി. ഇവരെ ബ്ലാക്ക്ലിസ്റ്റിലും ഉൾപ്പെടുത്തിയിട്ടുണ്ട്. ഖത്തറിന്റെ ആരോഗ്യമേഖലയിൽ ജോലി ചെയ്യുന്നതിൽ നിന്നും ആജീവനാന്തം ഇവരെ വിലക്കിയിട്ടുണ്ട്.

ആരോഗ്യ വിദഗ്ധർ ജോലി ചെയ്തിരുന്ന തസ്തികകൾ, പ്രവർത്തി പരിചയം(വർഷങ്ങൾ), അല്ലെങ്കിൽ സ്ഥാപനത്തിന്റെ സ്വഭാവം തുടങ്ങിയ വിവരങ്ങളിൽ കൃത്രിമം കാണിക്കുന്നതാണ് മിക്ക വഞ്ചനാപരമായ ശ്രമങ്ങളിലും ഉൾപ്പെട്ടിരിക്കുന്നതെന്ന് പൊതുജനാരോഗ്യ മന്ത്രാലയത്തിലെ ഹെൽത്ത് കെയർ പ്രൊഫഷൻസ് വിഭാഗം ഡയറക്ടർ ഡോ. സാദ് അൽ കാബി വിശദീകരിച്ചു. കൂടാതെ, വിശ്വാസയോഗ്യമല്ലാത്ത സ്ഥാപനങ്ങളിൽ നിന്നുള്ള അക്കാദമിക് യോഗ്യതകളിൽ കൃത്രിമം കാണിച്ച സംഭവങ്ങളും യോഗ്യതാ പരീക്ഷകളിൽ (പ്രോമെട്രിക്) തെറ്റിദ്ധരിപ്പിക്കുന്ന ഫലങ്ങളും സമർപ്പിച്ചിട്ടുണ്ട്. ഡോക്‌ടർമാർ, നഴ്‌സുമാർ, അനുബന്ധ ആരോഗ്യ വിദഗ്ധർ എന്നിവരുൾപ്പെടെ എല്ലാ വിഭാഗങ്ങളും സ്പെഷ്യലൈസേഷനുകളും ലംഘനങ്ങളിൽ ഉൾക്കൊള്ളുന്നുവെന്നും അദ്ദേഹം വ്യക്തമാക്കി.

പ്രാക്ടീഷണർമാർക്ക് തെറ്റായതോ തെറ്റിദ്ധരിപ്പിക്കുന്നതോ ആയ സർട്ടിഫിക്കറ്റുകൾ നൽകുന്ന ആരോഗ്യ സംരക്ഷണ സ്ഥാപനങ്ങളെയും ബ്ലാക്ക്ലിസ്റ്റിൽ ഉൾപെടുത്തിയിട്ടുണ്ടെന്നും, ഈ സ്ഥാപനങ്ങൾ നൽകുന്ന ഒരു സർട്ടിഫിക്കറ്റുകൾ സ്വീകാര്യമല്ലെന്നും അധികൃതർ വ്യക്തമാക്കി. തെറ്റായ അനുഭവ രേഖകൾ നൽകിയ എല്ലാ സ്ഥാപനങ്ങളും ആരോഗ്യ സംരക്ഷണ സൗകര്യങ്ങളും ഖത്തറിന് പുറത്താണെന്നും ഡോ അൽ കാബി കൂട്ടിച്ചേർത്തു.