ന്യൂസ്റൂം ഇന്റര്നാഷണൽ ഡെസ്ക്
വാഷിങ്ടണ്:ഹമാസ് രാഷ്ട്രീയ,നയതന്ത്ര മേധാവി ഇസ്മയിൽ ഹനിയ്യയുടെ വധത്തിന് പിന്നാലെ ഇറാനിൽ നിന്നുള്ള ഭീഷണി നേരിടാൻ ഇസ്രായേലിന് അമേരിക്കയുടെ പിന്തുണ. ഇസ്രായേലിനെ സഹായിക്കാൻ മിഡില് ഈസ്റ്റില് സൈനിക സാന്നിധ്യം വർധിപ്പിക്കാനൊരുങ്ങുകയാണ് യു.എസ്. ഇസ്രായേലിനെതിരെ ഇറാൻ തിരിച്ചടി മുന്നില്കണ്ടാണ് യു.എസിന്റെ നീക്കം.
കഴിഞ്ഞ ദിവസം ഇസ്രായേല് പ്രധാനമന്ത്രി ബിന്യമിൻ നെതന്യാഹുവുമായി യു.എസ് പ്രസിഡന്റ് ജോ ബൈഡൻ ഫോണില് സംസാരിച്ചിരുന്നു. സംഭാഷണത്തില് ബൈഡൻ ഇക്കാര്യം അറിയിച്ചുവെന്നാണ് റിപ്പോർട്ട്.
ഭീഷണികള്ക്കെതിരെ ഇസ്രായേല് പ്രതിരോധസേനക്ക് യു.എസ് പിന്തുണ നല്കും. പുതിയ സൈനിക വിന്യാസം നടത്തുന്നതുള്പ്പടെ ഇതിന്റെ ഭാഗമായി ഉണ്ടാവുമെന്ന് ബൈഡൻ നെതന്യാഹുവിനെ അറിയിച്ചു. യു.എസ് സെൻട്രല് കമാൻഡുമായി പെന്റഗണ് ഇക്കാര്യം ചർച്ച ചെയ്തുവെന്നാണ് സൂചന.
എന്നാല്, ഏത് തരത്തിലുള്ള അധിക സൈനികവിന്യാസമാണ് വേണ്ടതെന്ന് കാര്യത്തില് അന്തിമ തീരുമാനമായിട്ടില്ല. നിലവില് ഗള്ഫ് ഓഫ് ഒമാനില് യു.എസിന്റെ തിയോഡർ റൂസ്വെല്റ്റ് കാരിയർ സ്ട്രൈക്ക് ഗ്രൂപ്പിന്റെ സാന്നിധ്യമുണ്ട്. ഇവരെ പിൻവലിച്ച് യു.എസ്.എസ് എബ്രഹാം ലിങ്കണ് പടക്കപ്പലിനെ കൊണ്ടു വരും. നാല് യുദ്ധവിമാനങ്ങളേയും മേഖലയില് വിന്യസിക്കും.
ഹമാസിന്റെ ഉന്നത നേതാവ് ഇസ്മായില് ഹനിയ്യ ഇറാനില് വെച്ച് വധിക്കപ്പെട്ടതോടെ ഇസ്രായേലിനെ ഇറാൻ ആക്രമിക്കാനുള്ള സാധ്യതകളേറിയിരുന്നു. ഇതേതുടർന്നാണ് യു.എസ് ഉള്പ്പടെയുള്ള രാജ്യങ്ങള് ഇസ്രായേലില് സുരക്ഷയൊരുക്കാനായി കൂടുതല് സൈനിക സന്നാഹങ്ങളൊരുക്കുന്നത്.
ന്യൂസ്റൂമിന് ഇപ്പോൾ ഒന്നര ലക്ഷത്തിലധികം വായനക്കാർ. നിങ്ങൾക്കും തൽസമയം അറിയാൻ ഈ ലിങ്കിൽ വിരൽ തൊട്ടാൽ മതി
https://chat.whatsapp.com/GTzSb7qlzutArCPMdri119
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F 
