December 12, 2020
December 12, 2020
കോഴിക്കോട് : നോവലിസ്റ്റും ചെറുകഥാകൃത്തുമായ യു.എ. ഖാദര് അന്തരിച്ചു. കോഴികോട് സ്വകാര്യ ആശുപത്രിയിലായിരുന്നു അന്ത്യം. 1935 ല് ബര്മ്മയിലായിരുന്നു ജനനം..
അഘോരശിവം, ഒരുപിടി വറ്റ്, ചങ്ങല, അടിയാധാരം, തൃക്കോട്ടൂര് പെരുമ, കളിമുറ്റം, കഥപോലെ ജീവിതം, കൃഷ്ണമണിയിലെ തീനാളം, ഖാദറിന്റെ പത്തു ലഘു നോവലുകള്, ഖാദറിന്റെ പെണ്ണുങ്ങള് എന്നിവ പ്രധാന കൃതികള്. ഇംഗ്ലീഷ്, ഹിന്ദി, കന്നട, തമിഴ് ഭാഷകളില് കഥകള് വിവര്ത്തനം ചെയ്തിട്ടുണ്ട്. കേരള സാഹിത്യ അക്കാദമി അവാര്ഡ് (രണ്ടു തവണ), അബുദാബി ശക്തി അവാര്ഡ്, എസ് കെ പൊറ്റെക്കാട്ട് അവാര്ഡ്, മലയാറ്റൂര് അവാര്ഡ്, സി എച്ച് മുഹമ്മദ് കോയ സാഹിത്യ അവാര്ഡ് എന്നിവ ലഭിച്ചു.
കേരളീയനായ പിതാവ് മൊയ്തീന് കുട്ടി ഹാജിയുടേയും ഇപ്പോഴത്തെ മ്യാന്മാര് സ്വദേശിനിയായ മാമൈദിയുടേയും മകനായി 1935ല് കിഴക്കന് മ്യാന്മാറിലെ ബില്ലിന് എന്ന ഗ്രാമത്തില് ജനിച്ച യു.എ.ഖാദര് രണ്ടാം ലോകമഹായുദ്ധകാലത്ത് കേരളത്തിലെത്തി. പുരോഗമനകലാ സാഹിത്യസംഘം മുന് സംസ്ഥാന പ്രസിഡന്റും കേരളസാഹിത്യ അക്കാദമി, കേരള ലളിതകലാ അക്കാദമി എന്നിവയില് അംഗവും സാഹിത്യ പ്രവര്ത്തക സഹകരണസംഘം വൈസ് പ്രസിഡന്റുമായിരുന്നു. -
കൊയിലാണ്ടി ഗവ. ഹൈസ്കൂളിലെ പഠനത്തിന് ശേഷം മദ്രാസ് കോളജ് ഓഫ് ആര്ട്സില് ചിത്ര കലാപഠനം നടത്തി. ആകാശവാണി കോഴിക്കോട് നിലയത്തിലും മെഡിക്കല് കോളേജ് ഇന്സ്റ്റിറ്റ്യൂട്ട് ഓഫ് മെറ്റേണല് ആന്ഡ് ചൈല്ഡ് ഹെല്ത്തിലും ഗവ. ജനറല് ആശുപത്രിയിലും ജോലി ചെയ്ത ഖാദര് 1990ലാണ് സര്ക്കാര് സര്വീസില്നിന്ന് വിരമിച്ചത്. ഇംഗ്ലീഷ്, ഹിന്ദി, കന്നട, തമിഴ് ഭാഷകളില് കഥകള് വിവര്ത്തനം ചെയ്തിട്ടുണ്ട്.
ന്യൂസ്റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന വാട്സ്ആപ് നമ്പറിൽ സന്ദേശമയക്കുക