January 27, 2022
January 27, 2022
ദോഹ : കോവിഡിന്റെ പശ്ചാത്തലത്തിൽ നിലവിൽ വന്ന ഗ്രീൻ, റെഡ്, എക്സെപ്ഷണൽ റെഡ് മുതലായ ലിസ്റ്റുകളിൽ മാറ്റങ്ങൾ വരുത്തിയതായി ആരോഗ്യ മന്ത്രാലയം അറിയിച്ചു. ജനുവരി 30 ഞായറാഴ്ച വൈകുന്നേരം ഏഴ് മണി മുതലാണ് പുതിയ പട്ടിക പ്രാബല്യത്തിൽ വരിക. പുതുക്കിയ പട്ടിക പ്രകാരം 117 രാജ്യങ്ങളാണ് ഗ്രീൻ ലിസ്റ്റിൽ ഉള്ളത്. റെഡ് ലിസ്റ്റിലെ രാജ്യങ്ങളുടെ എണ്ണം വർധിച്ച് 86 ലേക്കെത്തി.
കടുത്ത നിയന്ത്രണങ്ങൾ ഉള്ള എക്സെപ്ഷണൽ റെഡ് ലിസ്റ്റിലെ രാജ്യങ്ങളുടെ എണ്ണം ഒൻപതിൽ നിന്നും ആറാക്കി കുറച്ചിട്ടുണ്ട്. ഈജിപ്ത്, ബംഗ്ലാദേശ്, ഇന്ത്യ, നേപ്പാൾ, പാകിസ്ഥാൻ, ഫിലിപൈൻസ് എന്നീ രാജ്യങ്ങളാണ് ഈ പട്ടികയിൽ തുടരുന്നത്. റെഡ് ലിസ്റ്റിൽ പെട്ട രാജ്യങ്ങളിൽ നിന്നും ഖത്തറിൽ എത്തുന്ന ആ രാജ്യത്തെ പൗരന്മാർ, അറബ് രാജ്യങ്ങളിലെ പൗരന്മാർ, ഖത്തർ പൗരന്മാർ തുടങ്ങിയ വ്യക്തികൾ ഖത്തറിലെയോ മറ്റ് രാജ്യങ്ങളിലെയോ അംഗീകൃത വാക്സിൻ സ്വീകരിച്ചിട്ടുണ്ടെങ്കിൽ ഇവർക്ക് നിർബന്ധിത കൊറന്റൈൻ വേണ്ടതില്ല. അതേസമയം ഇവർ ഖത്തറിൽ എത്തിയ ഉടനെയുള്ള പീസീആർ പരിശോധന ഫലം ഹാജരാക്കണം. 11 വയസിൽ താഴെയുള്ള കുട്ടികളുടെ കൂടെ വരുന്ന രക്ഷിതാക്കളിൽ ഒരാളെങ്കിലും വാക്സിനേഷൻ പ്രകിയ പൂർത്തിയാക്കിയിരിക്കണമെന്നും അധികൃതർ അറിയിച്ചു.